Psa 48 | NdeIBE | STEP | Ingoma. Ihubo lamaDodana kaKhora. Umkhulu uJehova, ufanele ngokuphindiweyo ukudunyiswa, emzini kaNkulunkulu wethu, intaba yakhe engcwele.

Psalms 48

1 Umkhulu uJehova, ufanele ngokuphindiweyo ukudunyiswa, emzini kaNkulunkulu wethu, intaba yakhe engcwele.

2 Muhle kakhulu ngokuphakama kwakhe, uyintokozo yomhlaba wonke. Njengeziqongo zeZafoni injalo intaba iZiyoni, umuzi weNkosi eNkulu.

3 UNkulunkulu usemithangaleni yawo; ubonisa ukuthi nguye oyinqaba yawo.

4 Kwathi lapho amakhosi ehlanganisa izimpi zawo, lapho ehlasela kanyekanye,

5 awubona umuzi lo ethuka aphaphatheka esetshaywa luvalo.

6 Ahle athuthumela khonapho, ezwa ubuhlungu obuzwiwa ngowesifazana ehelelwa.

7 Wena wabatshabalalisa njengemikhumbi yaseThashishi ibhidlizwa ngumoya wempumalanga.

8 Lokho esikuzwileyo yikho esikubonileyo emzini kaJehova uSomandla, emzini kaNkulunkulu wethu: uNkulunkulu uzawuvikela lanini.

9 Phakathi kwethempeli lakho, O Nkulunkulu, siyacabanga ngothando lwakho olungaphuthiyo.

10 Njengebizo lakho, O Nkulunkulu, udumo lwakho lufika emikhawulweni yomhlaba; isandla sakho sokunene sigcwele ukulunga.

11 INtaba iZiyoni iyathokoza, imizi yakoJuda iyathaba ngezahlulelo zakho.

12 Hambahamba eZiyoni, ibhode, bala izilindo zayo eziphezulu,

13 nanzelela kuhle imithangala yayo, hlola izinqaba zayo, ukuze ukwazi ukulandisela isizukulwane esizayo.

14 Ngokuba uNkulunkulu lo nguNkulunkulu wethu nini lanini; uzakuba ngumholi wethu lasekupheleni.